Umhverfisþættir og vöktun

Vöktun á uppsprettuþáttum

Allar mælingar eru framkvæmdar samkvæmt mæliáætlun í grein 3.1 í starfsleyfi. Alls eru vaktaðir 35 þættir í innri vöktun, þ.e.a.s. losun innan lóðarmarka Elkem Ísland. Efni í útblæstri, frárennsli og kísilryki sem og hávaði frá starfseminni eru mæld reglulega. Fylgst er með virkni reykhreinsivirkja með sívöktun á neyðarreyklosi frá ofnum verksmiðjunnar. Ryk er mælt í útblástursopum, þ.e. um þakháfa og þakop í ofnhúsi, frá hreinsivirkjum töppunarreyks, útsteypingar og mölunar. Fylgst er með losun kolefnistvíoxíðs (CO₂), brennisteinstvíoxíðs (SO₂) og nituroxíðs (NO_X). Í frárennsli frá verksmiðjunni er mælt magn svifagna, olíu og fitu, ásamt sýrustigi og málmum.

Á árinu 2025 náðist framkvæmd rykmælinga ekki á öllum tilheyrandi stöðum út af stjórnsýslulegum breytingum innan Hafrannsóknarstofnunnar og Matís. Lögð var áhersla á að ná mælingum einu sinni á öllum staðsetningum sem hafa mælingartíðni tvisvar á ári og var mæling á ryki frá mölun og sigtun 1 frestað til ársins 2026.

Allar umhverfismælingar eru framkvæmdar af faglegum, heiðarlegum og óháðum aðilum undir eftirliti Umhverfisstofnunar.